မလေးတို့ဟူးကြော်(Tofu Goreng)

မလေးနာမည်ကိုလူပိုသိပါတယ် အင်ဒိုနီးရှားကနေဆင်းသက်လာတဲ့ အစားအစာ၁ခုပါပဲ
ကျနော်လည်း ခုတလော စာမရေး အကိုအမတွေကိုလိုက်မနှတ်ဆက်နိုင်တာကြာပါပြီ
ခုတော့ အားမရှိတဲ့ကြားကနေ ၁ခုရေးလိုက်ပါတယ် တို့ဟူးကြော်လေးပါ
ကျနော်အရှေ့မှာရေးခဲ့တဲ့ Peanut Sauce လေးနဲ့တွဲစားမယ်ဆိုလည်းလိုက်ပါတယ်
အင်ဒိုနီးရှားတွေကတော့ အဲလိုစားတယ်ဗျ တို့ဟူးဆိုပေမယ့် အမှန်တော့ ပဲပြားပါပဲ Bean curds
သူတို့ကတော့ တို့ဟူးလို့ခေါ်တာပေါ့ ကျနော်တို့သုတ်စားတဲ့တို့ဟူးလိုမျိုးတော့မဟုတ်ဘူး
ပြောရင်းနဲ့တို့ဟူးသုတ်တောင်စားချင်လာပြီ ထားပါလေ ကဲချက်ပါပြီ စပြီးတော
စကားမစပ် သူက ပဲပြားအစာသွပ်လိုပါပဲ concept ချင်းတော့ အတူတူပါပဲ နိုင်ငံမတူလို့
လုပ်ပုံလုပ်နည်းကွာသွားတာပါပဲ့
လိုအပ်တာ

• ပဲပြား ၁တုံး(၂ခြမ်းခြမ်းပါ)
• သခွားသီး အနည်းငယ်(ပါးပါးလှီး)
• ဂေါ်ဖီထုတ် အနည်းငယ်(ပါးပါးလှီး)

အချဉ်အတွက်

• ငရုတ်သီးစိမ်း အနည်းငယ်(ဒါးပြားရိုက် ပါးပါးလှီး)
• ကြက်သွန်ဖြူ အနည်းငယ်(ဒါးပြားရိုက် ပါးပါးလှီး)
• ပဲငံပြာရည် စားပွဲဇွန်း ၃ဇွန်း(Shouyu ကိုညွှန်းပါတယ်ကျနော်ကတော့)
• သံပုရာရည် စားပွဲဇွန်း ၁ဇွန်းခွဲ (၂ဆ ၁ဆ)
• နံနံပင် အနည်းငယ်နှတ်နှတ်စဉ်း
• အရသာမှုန့် အနည်းငယ်

ပြုလုပ်ပုံ
လွယ်ပါတယ် တော်တော့်ကိုလွယ်တာပါ
ပဲပြားကို ဆီပူပူမှာ ကြော်ပါ ဆီက ပဲပြားနစ်ရပါမယ်
အပေါ်ယံကျောတင်းပြီး အရောင်ရလာပြီကျက်လာပြီဆို ရပါပြီ
ပဲပြားကို ဆယ်လိုက်ပါ
အနည်းငယ်အေးအောင်စောင့်ပေးပါ
အလယ်ကနေခွဲလိုက်ပါ သခွားသီးနဲ့
ဂေါ်ဖီထုတ်ကိုအစာသွပ်ပါ
အပေါ်က ငရုတ်သီးအနီကတော့ ကျနော်တို့ အလှဆင်ထားတာပါ
အချဉ်လေးနဲ့တို့ပြီးစား တော်တော်ကောင်းပါတယ် သုံးဆောင်ကြပါဗျာ